+:: منتديات أمل الكويت ::+

زمــان الآوفيــاء




هلا ياللي ذبحني منك .. كثر الهمّ والتفكير هلا ياللي... أهلّي بك ودمعاتي وسط عيني

هلا ياحيره الدمعه... هلا يانشوه التعبير هلا ياعشقٍ اغواني ..وحيرني .. سكن فيني

وانا ذاك الحزين اللي ..يحارب فكرة التغيير لجل يبقى على عشقٍ قديمٍ وقت وسنينـي

أبي منك الوصل والحب ..مااتحمل التأخير وانا في دمعتي حرفك.. وفي خدّك بساتيني

رجيتك يانظر عيني ..رجيتك فسّري تفسير على ذاك الغياب اللي يجي مابينك وبيني

تركتيني ..جفيتيني ..وقلبي يطلب التحرير من قيود الغرام اللي ..نصبتيها على يديني

وسط قلبي عذاب وهم ..فيّ من الجفا تأثير من اسبابك وبأسبابك سهوم الهجر تكويني

وفي هالوقت جيتيني ..سألتيني عساك بخير جرحتيني وياليتك..سكتتي مـا سألتينـي

وإذا جا للخيانه في زمان الافياء .. تبرير أنا بنساك ياعمري.. قبل مانتي تخونينـي

================================================== ===============
الحب حاكم والوفا مستشــاره

يابنت قولي كـان ودّك تقوليـن
قبل الفراق وقبل ننهي الزيـاره

إذا يجي في خاطرك شي تكفين..
قوليه قلبي مايطيـق انتظـاره

وانا أوعدك مع مر الايام تنسين
ذاك الحبيب وقصته وأنتصـاره

ماهوب انا اللي تامرينه وتنهين
انا ابيعك واشتريـك بخسـاره

عندي دلايل مع حقوق وبراهين
ان التغـلـي للهوى انهـيـاره

ماهمني مالك وعزّك وهالزيـن
ولاتحسبين أن المحبه شطـاره

ومهما كتبنا من بيوت ودواوين
لا مانوفّـي بالمحبـه عبـاره

الصدق ورده والمحبه بساتيـن
وترى اللبيب يجيد فهم الاشـاره

الحب كلمه.. ماتوصّف بحرفين
الحب حاكم..والوفـا مستشـاره
================================================== ===============
رحلة الخّلان


بـــــــــــعـــــــــــد
مــاتــبــحــر الــنــجــمـــه
وتــــــــــتــــــــــرك
روعــــــــة الـــشـــطّـــآن
يجي صبحٍ.. يبعثر مابقى مـن هاجـس ونيّـه

بعد ماكنت انا استرجع خفايـا رحلـة الخـلان
أحاول كشف مايخفى عليّ.. مـن الهـوى فيّـه

طوال الليل بعيونـي متون..ونظره..وحجّـان
تشكّل لي على طيف الغـرام طيـوف حوريـه

يجيني لادنى منّـي يكـرر رحلـة الهجـران
وانا بااموت من طيفٍ عجزت امسك سوى ضيّه

جماله لو بغيت اوصف جماله للحـلا سلطـان
عطـاه الله جمـالٍ بالخلايـق مايجـي زيّـه

لها عيونٍ من وصوف الجمال تحيّـر الانسـان
ولها خدٍ كما عقـدٍ لمـع فـي وقـت ظهريـه

وإذا جيت الشفايف بالشفايف روعـة المرجـان
أغار من الشفايـف لاألتقـت واصفّـق يديّـه

شعرها لا بـدى ليلـي يقـدم للسمـا شرطـان
أشوفه ثابـتٍ حـول القمـر والكـون ماريّـه

لها زولٍ كمـا عـودٍ تمايـل والنهـد رمّـان
لها خصرٍ دقيقٍ يذهلـك فـي روحـه وجيّـه

فتنّي في غلاه وعـذّب عيونـي رفيـع الشـان
عسالله يحفظه بالوقت من شخـصٍ يبـي غيّـه

وإذا كان الحسن نصّه سكن يوسف زمانٍ كـان
أنا خلّي حلا هالكـون كلـه .. نفسـه الحيّـه
================================================== ===============
الزيتون والفنجــال


سلام الله على رمـشٍ يضلـل ناعـس عيونـه
عن الشمس وعن البرد وعـن الحسّـاد والعـذال

عيـونٍ مثـل فنجـالٍ تمخطـر فيـه زيتونـه
وانا ادري وصفها يكرم عن الزيتون والفنجـال

سلامٍ يبتـدي مـن أخمـص الرجليـن لمتونـه
وسلامٍ للقمر يومه سكن فـي وجههـا وأختـال

شعرها..مثل بـراقٍ نشـى ثـم هلّـت مزونـه
على كتفٍ كمـا أرضٍ تشفّـق للسيـول خيـال

ألا ياسـمّ حالـي ياهبـوبٍ طـيّـر قـرونـه
جديلٍ في هجير الشمس خلّى للضعيـف ضـلال

وإذا جيت الجبين اللي يغار الـورد مـن لونـه
تشوف النور فوق النور في عرض الجبين أنهال

وحجٍ وقفـت الشامـه عليـه اليـوم وشلونـه؟
بعد ماشامته وقفت وشافت مـن حـلاه أهـوال

تحسب إن السيوف الجارحـه ماغيـر بجفونـه
لقت جيشٍ علـى حـدّ الجفـن للكايـده حـلاّل

وخدٍ يرقص النرجس مـع الرمّـان فـي كونـه
تغزّل فيه من قبلي عقـاب ومـن وراه أجيـال

أنا لاحـدٍ بغـى موتـي يـدنّ لقلبـي لحونـه
يطـرّي شفـةٍ فيهـا وعيـد المـوت والدجـال

خلاياها من العطـر وبهـا الياقـوت يطرونـه
وانا مدري! يقولون العسل فيها يسمى 'سعـال'.!

إلى منّه حكى شفـت الفـرات العـذب بركونـه
وإلى منّه ضحك طحت .. وصعيبه طيحة الرجال

كما اللولو .. تحت رشّة مطـر ياعالـم سنونـه
تشوف اللي وراها بالجمـال مفصّلـه تفصـال

وعنـقٍ مايذكرنـي حـلاه وروعـة فنـونـه
سوى عنق الغزال اللي يدوّر فـي سمـاه هـلال

وإذا جيت النهـد يالله عسـى الحسّـاد يفدونـه
كما وقفة أسد وقّف غضب مقتول منـه أشبـال

أو الشخص السجين اللي سجن من سبّـة ديونـه
وقف وقفة فرح بعد العفـو مـن دينـه القتّـال

وخصرٍ كل ابـو هالنـاس والاكـوان يرجونـه
بشرقـه جنّـة الدنيـا وغربـه للشقـى منـزال

ليا منّه مشـى للـورد.. ذاب الـورد بشجونـه
وإلى منّه وقف غنّت لـه الدنيـا : يـالال ولال

وردفٍ لعنبو جـدّه تحـرّك وارسـل طعونـه
على قلبٍ يعاني من صواديـف الدهـر ولـوال

جمع عز وجمـع ذل وجمـع تشتيـت ومهونـه
جمع كره العدو وايضاً جمع معها معـزّة خـال

وعود الخيزران اللي علـى ساقـه بـدى نونـه
يغطّيه بطرف ثـوبٍ يلامـس أسفلـه خلخـال

وترى قيس الملوّح لو كتب واسترسـل جنونـه
أبد..مايوصل لوصفٍ مثل وصفه ومهمـا قـال

وترى العلم الوكاد اللي بأقوله : شوفـوا عيونـه
وانا اتحدى جميـع النـاس والحسّـاد والعـذال

إذا كان الحسن فيهـا يشابـه: لـبّ زيتونـه ..
أنا لي الفخر لاقيل : عينـه تشبـه الفنجـال ...

================================================== ===============
تنهيدة المجبــور


على أروع بحر بأكتب قصيده.. والقصيد بحـور
بها 'هزج' وبها 'رجز' وبها 'مسحوب' و'هلالـي'

بها شي ٍ بنا ياخذ مـن العهـد القديـم عصـور
وبها شـي ٍ نشـى تـوّه جديـد بوقتنـا الحالـي

وانا بأكتب على طرقٍ له بقلبـي غـلا وشعـور
اذا ضاقت بي الدنيا.. هو الكيـف وهـو دلالـي

واذا ضام الزمن صدري.. بدا يسكن حشاي سرور
واذا صاب القهر قلبي.. وقف وحده علـى جالـي

وانا هم الهوى فيني .. من سنينٍ مضت وشهـور
فرح وصلْ.. وندم بُعْد.. ومعاذير.. وعَنَـا بالـي

عَنَا بالي سبب بنتٍ بَنَـتْ بيـن الحنايـا سـور
لها عرشٍ وسط صدري.. ولكن للأسف !! خالـي

ولها قانونها الجاير.. ' ضياع ومعضلات وجور '
هي الحُكم وهي التُهمه.. هـي السجّـان والوالـي

هي الدمع وهي الشمع وهي الليل وهي المستـور
هي ايامي هي آلآمي هـي اوهامـي وغربالـي

هي النزف اليتيم اللي وسط صفحة عنـاي يثـور
هي الحرف الأليم اللي بدا يطغـى علـى اقوالـي

هي الحزن العظيم اللي خلق صمتي وانا معـذور
هي النور البعيـد اللـي أشـوف .. ولا تهيّالـي

هي الحب الوحيد اللي جرح قلبي بـدون قصـور
هي الطب الوحيد اللي .. بـرَعْ بعـلاج عذّالـي

تخالط في خوافـي خافقـي ' تنهيـدة المجبـور '
مع ' إحساسي وانا أشرب مع الذربيـن فنجالـي '

وانا قبل الهوى واللي خلق راسي .. 'كواكب نور'
و 'انا' ( واعوذ به من شرها ) تشهد لـي افعالـي

هويت ولا هويـت إلا.. بقايـا ليلـي المقهـور
لقيت ولا لقيت إلا.. ردى الحـظ وشقـى حالـي

ضحكت ولا ضحكت إلا.. انا والخاطر المكسـور
شكيت ولا شكيـت إلا.. علـى حرفـي وموّالـي

مشيت ولا مشيت إلا.. طريق 'التايه'.. المهجـور
وقفت ولا وقفت إلا.. وانا تايـه علـى أطلالـي

شقيت وبالشقى شانت شواهـد قلبـي المسحـور
صدقت وصابني صالي صراحة صافي وصالـي

كتبت ولا كتبت إلا.. بعض قصّة 'ذبول زهـور'
لأجل يسمع هذاك اللي يقـول: الدهمشـي سالـي

انا لي بالعنا راية شقـى وارضٍ.. بهـا دستـور
أكابـر واخفـي همومـي ولوعاتـي وغربالـي

================================================== ===============
حبر القلم


ياصاحبي .. (حبرْ القلم) في يدي جـفّ
وآنا اتحـرى طـول ليلـي.. شرايـد

حتى الشعر ماله على دفتـري شـفّ!!
والليل يمضي بيـن ضيـق.. ونكايـد

الفكر.. صفّ هموم صدري مية صفّ
متشابهـاتٍ بالسـبـب .. والعقـايـد

ومتساويـاتٍ كنهـن بسطـة الـكـفّ
والا كمـا نظـم الخـرز .. للقـلايـد

جمر الزفير اليا طلـع.. يتبعـه ' اُف '
ياصاحبـي والضيـم فينـي.. تزايـد

الضحك عن مبسم شفا صورتي.. هفّ
والا انت عن ضيقي مع الضحك.. نايد

ارجوك في جرحي بعد قسوتـك خـفّ
وازهدْ .. ترى خير الخليل .. ' المحايد '

ارجع وعن صدٍ كـوى خافقـي عـفّ
واعرف ترى قانون حبـكْ .. تسايَـدْ

هاك الوعود فداك قلبـي لهـن .. وفّ
وفّ الوعود وخـل عنـك .. الوعايـد

من رحت والضيقه لها بالحشا ..' خُفّ '
بين الضلـوع موسـدٍ لـه .. وسايـد

لا امسيت ترفات المصايب لهـن زفّ
ولا اصبحت بين طعون ليلٍ .. فرايـد

ياصاحبي.. قمْ للحشا وافتحه .. شـفْ
شف منهو اللي بين الاحبـاب .. زايـد

واذا عرفته!!.. لو تبي تبتعـد .. قـفّ
واعرف ترى قلبي بَعَدْك انت .. بايـد

واشعل شموع الحب وارجع لهن طـفّ
وشيع جنازة قلـبْ .. شاعـر شرايـد

يمـر ليلـه ماحصـل لـه ولا شـفّ
هم وعنا.. وطعـون ليـل .. ونكايـد
================================================== ===============
الشاذليه


الله اكبر لا استمالت وانثنت لحدود عينـي
والله اكبر لاتباطى شعرها حـزّة مجيّـه

استحث الشوق فيها وتستثير الحـبْ فينـي
واستثير الحبْ فيها وتستحث الشـوق فيّـه

تمتلكنـي وامتلكهـا وافتديهـا وتفتدينـي
دام قلبي في يديهـا وقلبهـا يسكـن يديّـه

لالمحت الزين فيها.. قلت مابالناس زينـي
ومن غلاها ماأطالع في حلى أحلى صبيّـه

كنها غرّ السحاب وكنهـا الـدرّ الثمينـي
وكنها وردٍ تمايل دون كاس .. ومزهريّـه

طيبها فاق البنات وعقلها عقـلٍ رزينـي
واصلها من راس قومْ..وثقلها مافيه زيّـه

يكتسح جلّ البياض اجزائها دقّ وسمينـي
ويمتلك كيفي جمال عيونها .. كالشاذليّـه

لاحكتْ كن الرحيق من الشّفا يقتصّ دينـي
ولابكتْ كنّ الحدايق من بكاها .. جرهديّه

وبالسكوت الكون كله في رجاها مستكينـي
وضحكها مثل القصيده باللحون السامريّـه

درّةٍ في وسط غبٍّ ماوصلـه الكاشفينـي
وصفها وصف الخيال وبالحقيقه.. واقعيه !

لولا ايماني بربي قلت: ذي 'ماهيب طيني'
جل شان اللي خلقها .. ولاخلق منها حليّـه

شربها عذبٍ زلال وزادها تـوتٍ وتينـي
ولابغت طعم 'الحلاوه' ريقها يعلنْ مجيّـه

مالها وصف وشبيهٍ بالحلا .. قولٍ يقينـي
للحضر فيها وصال وللبدو فيهـا حميّـه

ياعسالله مايبعّد زولها عن شـوف عينـي
وياعسى علم المفارق بيننا يبطـي مجيّـه

حلوتي.. هي نور عيني افتديها وتفتدينـي
من غلاها ماأطالع في حلى أحلى صبيّـه
================================================== ===============
بنـتْ التـَــرَفْ

يابنت مالي في كثـر مالـك اطمـاع
مبـدا حياتـي عزّتـي والقنـاعـه

ماجيت اعشقك طامـعٍ بـك وخـدّاع
ولاجيت ادوّر عنـد قلبـك بضاعـه

ولاجيت سلعه بيـن شـاري وبيّـاع
ولاجيتك اصنع بسمتي لك صناعـه

ولاجيت لك تايه ولاجيـت مطـواع
ولاجيت اعشقك بين ساعـه وساعـه

جيتك عزيز وعزّتي بين الاضـلاع
ولاهزّني جـور الزمـن واندفاعـه

وجيتك قنوعٍ بالمصايـب والاوجـاع
اضحك وانا قلبـي تحوفـه سباعـه

وجيتك صدوقٍ صادقٍ زين الاطبـاع
والكذب مالـه وسـط قلبـي وداعـه

يابنت انا شفتك على دربـي اشعـاع
اشعـاع حـب.. وجيتلـك بأتباعـه

ابي السهر.. والناس نومـى وهجّـاع
بأجمع بقايا الحـب حـزّة ضياعـه

الحب يا (بنت الترف) ماهـو إيقـاع
يرقص عليـه المعجبيـن بشجاعـه

ولاهو سوادٍ فـي مضاليـلٍ وسـاع
ولاهو جمالٍ بـان فيـه اصطناعـه

ولاهو كلام.. وضمّت ذراع لـذراع
ولاهو حضور الزيـن والا وداعـه

الحبْ مركبْ في بحر.. ماله شـراع
راسي على شاطـي خفوقـي متاعـه

هو الدليـل بحـزّةٍ صدقهـا ضـاع
وهو الحقيقه فـي زمـان الإشاعـه

يابنت واللـي خالـقٍ فيـك الابـداع
الحبْ.. فيني من سنيـن الرضاعـه

يمشي مع عروقي على عدّة اوضـاع:
حب الإله اللـي لـه الـروح طاعـه

وحب الرسول وديني اللي له انصَـاعْ
وامي.. وابوي.. وعزوتي.. والجماعه

هـذا غـرامٍ ثابـتٍ مابـه صـراع
يمـوت قلبـي ولا تغيّـر طبـاعـه

وبعده يجي حبٍ وسـط خافقـي ذاع
حـب الحبيـب وشوفتـه والتياعـه

اعشق ولا ادوّر ورى عشقي اطمـاع
واكسر حواجـز ضيقتـي بالقناعـه

يابنـت ماجيتـك ذليـلٍ وخــدّاع
ولاجيتلـك بايـع بليّـا بضـاعـه

جيتك عزيز وعزّتي بين الاضـلاع
ولاهزّني جـور الزمـن واندفاعـه

================================================== ==============
القوااااافي

تكفـون ياشعّـار نـظـم القـوافـي
كـل ٍ يحاسـب ياجماعـه ضميـره

تكفـون لاتقولـون هـرج ٍ ينـافـي
منهج هل الاسـلام فـي كـل ديـره

الشعر صدق احساس ظاهـر وخافـي
لحـد ٍ يحـاول يبتعـد عـن مسيـره

ياللـي تبـي كثـر الغـلا والهتافـي
المـدح مايجبـر ضلـوع ٍ كسـيـره

ياشاعر ٍ عن نظـم الابيـات.. هافـي
وش جاب رجلك للـدروب الغزيـره؟

الشعر ماهـو صـورة ٍ فـي غلافـي
للشعر نـاس ٍ فـي دروبـه خبيـره

ناس ٍ تجيب الشعـر طيّـب وصافـي
عن طيب نفس.. وطيب قلب.. وسريره

احد ٍ مشى في درب الاشـواك حافـي
شـاف الهوايـل والمـرار المريـره

واحد ٍ علـى الراحـه سليـم متعافـي
واسمه يجي في كـل مجلـس وسيـره

واحـد ٍ يغـازل لابسـات الغـدافـي
لافيـه لاخـوف ٍ ولا فيـه غِـيـره

واحد ٍ يـدوّج بيـن خضـر الفيافـي
عز الرجال .. اهل الوجيـه السفيـره

واحد ٍ على الطـولات دايـم يشافـي
والطيـب كلـه فـي يدينـه يـديـره

واحد ٍ علـى ربعـه يـدوّر خلافـي
وهـذاك انـا اسمّيـه ' نفّـاخ كيـره'

واحـد ٍٍ يقلّـد زاهيـات الوصـافـي
بالوجـه لمعـه ويتمـايـل بسـيـره

واحـد ٍ يقلّـد شكـل ملفـي ولافـي
واحد ٍ يقلّد كيف تضحـك ' اميـره'*

واحد ٍ يجيـك ومـن علومـه سنافـي
والنفس لو تبحـث تراهـا ضريـره

ويبقى الشعر غاااالي وله قـدر وافـي
في قلب من عـدّه .. حـزام وذخيـره
================================================== ===============
انا لولا غــلا نجـد العذيّ وعشقي ترابه

انا لولا غلا نجد العـذيّ وعشقـي ترابـه
لأسجّ اقدام رجليّ الهزيلـه للشقـى عنهـا

وانا لولا خفوقي بالهوى مستحمل مصابـه
لاموت من العيون اللي تعذّبنـي محاسنهـا

وانا لولا الصديق اللي لخفّاقي فتـح بابـه
لاقول الناس ماترحـم أشافيهـا ألآسنهـا

وانا لولا العدوّ اللي خفوقي حاسب حسابـه
لقيت ان الحشا ترجي رديّ الناس واشينهـا

ولو ذاك الطريق اللي خذا ذاك الغضي جابه
ضحكنا.. مابكينا والعيون اهتـزّ ساكنهـا

كثير اشياء يجهلها الحبيب بعالـم احبابـه
تخالف بالحياة النـاس خافيهـا ومعدنهـا

جهلنا بالزمان اللـي علينـا كشّـر انيابـه
وصار بوقتنا العليا تبارى مـع مطامنهـا

كبيره طعنة الفرقا علـى الخفّـاق جلاّبـه
جروحٍ في عيون الهم والاحـزان ساجنهـا

حبيبٍ بالهوى فيني حلـومٍ تشكـي غيابـه
تجمّع في دجى ليلي عسى ربـي يسكنهـا

حزينٍ بالزمن تايه وهم وضيـم اصحابـه
عيونه هاجس الفرقا عن المرقـاد جنّنهـا

الا يالله انا قلبي رجيتـك حلّـت انشابـه
بعد روحي .. تراني طالبك يالله حصّنهـا
================================================== ===============
بسمـــة فراق

حنيت لك واشتقت لـك واحتريتـك
واهديت لك قلبٍ على الدوم مشتـاق

علـيّ يشهـد خالقـي مانسيـتـك
حبك سكن في خافقي وسط الاعماق

ليتك تشوف اللي جرى اليوم ليتـك
قلبي كتب مع جايـر الهـم ميثـاق

ياليت تنفـع دمعتـي لـو بكيتـك
والله لابكي طول ليلـي للاشـراق

من يوم هجرك مانسيـت وسليتـك
ماغير اكفكف بالهدب دمعة اشـواق

إن زاد شوقي وجهتي (سور بيتـك)
والبيت من دونك فلاهـو بينطـاق

كم مرّةٍ من زود شوقي .. رثيتـك
ياماااااا عثيت من الغبينه بـالاوراق

أكتب: هويتك.. ثم هويت.. وهويتك
ويمر ليلي واقفٍ لي علـى سـاااق

وإليا انتهيت مـن القصايـد لقيتـك
بأقصى خفوقي راسمٍ (بسمة فـراق)

تقفي وانا بعـروق قلبـي شريتـك
ضاااقت علي دنياً بها خافقي ضاق

ياااصاحبي تقفي وانا مارويتـك؟!!
شفني على بير الظماااا دوم منسـاق

أن مرّ طيفك في حشى الصدر جيتك
وأسري مع حروفي ليا شعّ بـرّاق

هذااا كلامي فـي بعـادك فديتـك
مشتاق لك واحلف ملايين مشتااااااق
================================================== ===============
حبيبــة خافقــي


الا ياجملـة حـروف المعانـي
خذيت من الهموم اللـي كفانـي

شربت المرّ حتى صرت أحسـه
تشبّـع بالخفـوق.. وبالمحانـي

تنفست الحزن من صغـر سنـي
ولاجا لي علـى كيفـي زمانـي

كتبت الشعر.. وادميـت الدفاتـر
وصارت من كثر حزني تعانـي

يمـر اليـوم وتفـوت الدقايـق
وأشوف الموت بعيـون الثوانـي

ولكـن مـن بعـد ليلـة لقانـا
عرفت ان الزمن له شكل ثانـي

وعرفت ان الفضا ماعاد يكفـي
مساحة فرحتي ضحك.. وأغاني

( تقول: أني ((أحبك)) ياعيونـي
وتراني في وسط قلبك مكانـي)

وأقول: انتي ولا غيرك حبيبـه
ومهما الوقت بي جار وكوانـي

الا ياغايتـي مـن بـدّ غيـرك
فديتـك بالقصيـد وبالمعـانـي

فديتـك بالخفـوق اللـي تعـوّد
حنانـك بالوصـال وبالامانـي

لك الله لو أغيـب ولـو أسافـر
هواك لمركب اشواقـي موانـي

أشوفك حلـم وأتنفـس وجـودك
وأضمك كـل ماحزنـي لفانـي

وأشوفك صورةٍ بيـن الزوايـا
تعيـش بقربهـا كـل المبانـي

وأشوفك بينـي وبينـي لحالـك
ولاأحدٍ غيرك أعطيتـه كيانـي

انااا مهما ابتعدت ابقـى أشوفـك
وفي صوتك وهمساتـك أرانـي

حبيبة خافقـي.. يانـور عينـي
الايـا فرحـة ايامـي ترانـي:

نقشت اسمك على صدر المحبـه
وصار أسمك سبب ثورة حناني

الا يامـا حلـى ليـلـة لقـانـا
عساني ما انحرم منهـا عسانـي

دعا قلبك بعض حكـيٍ حكيتـه
وأنا لك حبـي الخالـد دعانـي

((أحبك)) قلتها (من كـل قلبـي)
وأبي يسمع بها قاصـي ودانـي

ولو ماقلت لك في يوم ((أحبك))..
ترى الله من على الدنيا خذاني...
================================================== ===============
يَا سَيـِّـدَه

خــــلـــــك مــــعـــــي ..
بــــأروي لـــــك الـقــصــه ..
قــصــة عــنـــا واتـخـيـلــي ..

قـصــه لـهــا اربـــع فـصــول ..
مــــثـــــل الـــســـنـــه ..
تـمـضــي ولا نــــدري مــتــى ..
نـفـرح خـريــف او هـــو شـتــاء ..
خــــلـــــك مــــعـــــي ..
وارجـــوك بــــإدراك ووعــــي ..
لاتكسـريـن الـكـاس مابـيـن اضلـعـي ..
تـدريـن لـيــه ولـيــه .. كـيــف ..؟
لان الفـرح عنـدي مثـل حـلـم الكفـيـف ..
بـالـنـوم فـــي حـلـمـه يـشــوف ..
واذا صحى يضـرب مـن الضيقـه كفـوف ..
وده يعيـش العـمـر نـايـم فــي هـنـى ..
وانــتــي وصــداتــك وانـــــا ..
مـثـل الـشـتـاء بـعــد الـخـريـف ..
ارجـع وابيـن لــك مـراحـل قصـتـي ..

الــفــصــل الاول انـــولــــدت ..
وعـشــت فـــي عـــز ورغـــد ..
طــــايــــش صــغـــيـــر ..
حـلـمـه مـــع الـعـالـم كـبـيــر ..
يـجـلـس مـــع الـعـالـم وهــــو ..
يـلـبـس مـــن الـعــزة حـريــر ..
حـلـمـه مـــع الغـيـمـه يـطـيــر ..
وينـقـش عـلــى صـــدر الـسـمـا ..
( انـــا انـــا يـانــاس غــيــر )..



وثانـي فصـول العمـر يابـنـت الـتـرف ..
يـعـرف بـهــا الـلــي مـاعــرف ..
نــــلـــــت الــــوســـــام ..


مـابـيــن طــــلاب الــدراســـه ..
والـــــــــســــــــــلام ..
قــربــت لـلـحـلــم الـعـظـيــم ..
قـــابـــلـــت ابـــــــــوي ..
وفــــي كــفــي اوراق الـنـجــاح ..
بـعــد الـتـعـب ويـــا الـكـفــاح ..
مـاكـنــت احــســب ان الـعـمــر ..
يخـفـي تـحــت فـرشــه جـــراح ..
عـانـقـنـي بــصـــدر الــدفـــا ..
الـلــي غــشــا دمّــــه وفــــا ..
رغــــم الـتـعـاسـه والـهــمــوم..
مـــن جـــور صـكــات الـزمــن ..
عــــــــاش الـــعـــزيـــز ..
مـايـكـسـره شــهــرٍ ويـــــوم ..
قـــــــــال ولـــــــــدي ..
والله لــــو تــبـــي الــجـــدي ..
خـــاطـــرك والله لأوصـــلـــه ..
قـلـبـي عـلــى كــفــك شــلــه ..
ماعـشـت عـمــري غـيــر لـــك ..
انـــا عـــن هـمـومــك فــلــك ..
ولـســان حـالــه لــــي يــقــول:
( الــوقــت مـاعـمــره صــفــا ) ..
( كــم واحـــدٍ طـــاح وهـفــى ) ..
( مــن بـعــد ماعـيـشـه رغـــد ) ..
( صــار الـرغــد هـــم ونـكــد ) ..

ورحـت اتفاخـر بالشهـاده فــي بــراءه ..
كنت احسب اني بأقضي ايامي سعيـد !!!!!!!!!!



وثالـث فصـول العمـر يابـنـت الـدلـع ..
خـافــي زمـانــي لـــي طــلــع ..
دارت بــــي الـدنـيــا وانـــــا ..
اشـــري مـــن هـمـومـي سـلــع ..
عشت الزمـن فـي مرحلـة مـوت القلـوب ..
مـحــدٍ عـــن افـعـالـه يــتــوب ..
واللـي يتـوب يعـاود لشمـسـه غــروب ..
وجــه الـزمـان اصـبــح شـحــوب ..
الهـم يدخـل عالمـي غــرب وجـنـوب ..
والله حـــتــــى فــرحـــتـــي ..
صــــارت بـقـلـبـي مستـحـيـلـه ..
مـاامـتـلـك لـلـضـحـك حـيــلــه ..
واذا ضـحـكـت اضــحــك وانــــا ..
مــــثـــــل الــيــتــيـــم ..
اللي على قبرٍ يضـم امٍ قبـل كانـت تضمـه ..
مثـل اليتيـم اللـي تحضّـن قـبـر امّــه ..
مثـل اليتيـم اللـي تحضّـن قـبـر امّــه ..
مثـل اليتيـم اللـي تحضّـن قـبـر امّــه ..
هـــــــــذا الــــفـــــرح ..
يــــامـــــتـــــرفـــــه ..
يــــــاســـــــيـــــــده ..
ياللـي كسـى وجهـك علا./.مـات الـدلال ..
اللـي بهـا نلتـي شـهـادات الـج،/،مـال ..
وانـا علـى قيـد الهمـوم اعقـد حـب./.آل ..
وانــده عـلـى الغـايـب ت./.عــااااال !!!
هـــــذا انـــــا يــاســيــده ..



ورابــــع فــصــول الـلاحـيــاة ..
شــاعــر ويـكـتــب أمـنــيــات ..
يـرســم الـــم يـمـحــي أمــــل ..
ويـلــمّ فـــي صـــدره شـتــات ..
بـاقــي مـــن ايــــام الــفــرح ..
كـســرة غــمــوض وذكــريــات ..
يـكـتــب مــــن هـمـومــه ورق ..
ويـرسـم عـلــى اوراقـــه غـــرق ..
شـاعــر يـعـيـش بـــلا حــيــاة ..
فـــي بـحــر ( مــاهــو آت.. آت )..
هـــــذا انـــــا يــاســيــده ..
ارجــــوك شــوفــي واحـكـمــي ..
حـتـى عـروقـي مايعانقـهـا دَمـــي !!!
والضحكتـيـن الـلـي يشكلـهـا فـمــي ..
صــارت عـلـى وجـهـي حـــرااااام ..
مـثـل الـفــرح .. وجـــه الـدُمــي ..

مـــنـــهـــو انــــــــــا ؟؟

غيـر انبـلاج الضيـم فـي وجـه الـكـلام ..
او انكسـار الوقـت فـي عمـر المُـضـام ..
لـو يبنـي العـشـاق بحـروفـي غــرام ..
ابـقـى انـــا الـشـخـص التـعـيـس ..
مـانـيـب قـايــل مـثــل قــيــس ..
لا والله بــهــمّـــي أشـــــــدّ !!
يعـنـي امـانـه .. روح مافيـهـا جـسـد ..
او جــســـم عـــايـــش دون روح ..
غــيــر الامــانــي والــجــروح ..
يـرسـم عـلــى الـشــط الـشـحـوح ..
قــــلـــــب وســــهـــــم !!
يــــــاســـــــيـــــــده ..
يــــامـــــتـــــرفـــــه ..
كــــلّـــــي ألــــــــــم !!
كـــــلـــــي الــــــــــم ..
وانتي وطن من ( ل <> ا </> م <> ل <> ا ) ..
مـن وجهتيـن الـكـون اقــري كلمـتـي ..
مــــن دون فــــوق ولا تــحــت ..
معـنـاي واضــح والبـدايـات انتـهـت ..
بــــــــــودعــــــــــك..
واذا فــقــدتــي صـــورتــــي ..
تلقينـهـا بـيـن الـزوايــا والـــورق ..
الــلــي مــلــى وجــهـــي أرق ..
واتذكري اني بهـا مـن دون انفـاس وحيـاة ..
شــاعــر ويـكـتــب امـنــيــات ..


ياسـيـده والـلـيـل والـذكــرى وانـــا
صــارت حكايتـنـا نقـاشـات الـقـلـوب
================================================== ===============
إنعِكَـاسْ المَرايَا


يااخـوان ياخـلان يااهـل السجايـا
مايوجع الرجـال.. كـود المشاريـه

خصوص لاجت دون ذنب وخطايـا
وخصوص لاصارت ورى سترة التيه

يااهل العقول يقال:../' كـل الرزايـا:
وصمه على مهفـي فعايـل مواليـه '

آرائنـا مثـل انعـكـاس المـرايـا
كلـن تعبـر كلمتـه عـن خوافيـه

احدن تخبّـى فـي ظـلال الزوايـا
يرمي وعاره يجتمـع فـي علابيـه

واحـدن يجـود ولـو حياتـه بقايـا
ماتوفـي الكلمـات كفّـة مساعـيـه

لكـن بلانـا مـن بطيـن الخفـايـا
اللـي يخفّـي نيتـه عـن مخاويـه

وايضا بلانـا مـن جـداد السوايـا
اللي مع الاحداث تظهَر معـا ( ليـه )

وايضـا بلانـا ناكريـن العطـايـا
اللي جحـد مـدّات عمـه ومعطيـه

وايضـا بلانـا محرقيـن الهـدايـا
الحاقديـن.. العاذليـن.. المسافـيـه

وايضـا بلانـا صانعيـن المـزايـا
كلن تصنّع صورتـه فـي مشاهيـه

هي قصّـةٍ بكتـاب صـدق الحكايـا
راحت مـن العـذال كذبـه وتشويـه

لي صاحـبٍ ماخـان لكـن بلايـا:
انـه يشـوه صورتـي يـوم اوفّيـه

ماخان لكـن حـان موعـد قضايـا
احسب معه مافات وايضـا اقاضيـه

الحب مفني وسـط صـدري قرايـا
وماضر قلبي غير ( آمر ) ( ولبيـه )

وماهجّ قلبـي غيـر زولـه صبايـا
حسبي علـى هجّـاج قلبـي ومفنيـه

اللي سمـع بالحـب قـول ووشايـا
واللي نشر في نور صبحـي لياليـه

لو كنت مخطـي دون قلبـي حنايـا
وحلقي يحدّه جزل عـذري واياديـه

لانيـب ناشـد صابغيـن الشفـايـا
بالكذب والعذر الغبي لاامتلى ( فِيـه )

اوفي وشربي لاحصل.. عن ضمايـا
وفعلي يغيض مسـلّ فعلـي ومهفيـه

هالوقت صار الزيـن مالـه حلايـا
ديكور مـن تصنيـع نـاسٍ تحلّيـه

والصدق صار الصـدق فينـا منايـا
طبعٍ يزيّـف منهجـه عـن مباديـه

والحـب ليـت الحـب مالـه خلايـا
فينـي وجعلـي مااتطـرى طواريـه

لاصـار ماللصـدق عنـده جزايـا
جعل الغرام يصيـر نـدّي واعاديـه

يالله تجعـل سيـف حـقـي يـدايـا
ويالله حـوّل ذنـب قلبـي حسانيـه

ويالله عـن هرجـات قفـوٍ دنـايـا
ويالله تدحـر دون دربـي معـاديـه

ويالله عـن زرقـات سـود النوايـا
عطفك ولطفك رب راسـي وواليـه


================================================== ===============
متنْ السفيـنـــه


ياساعتي لو مات نبـض المواقيـت
وقـت الفـرح تكفيـن.. لاتنكرينـه

من عام مابيّـن ولـو بـان سجيـت
يبيـن لـي لحظـه وثـم تسرقينـه

يامـا مـن دلال التعاسـه تقهويـت
وفنجـال فرحـي لالفـى تاخذينـه

ياساعتي واللوم مَبني علـى (ليـت)
وياليـت حلـم وأعتقـد.. تعرفينـه

حلمي لقا اللـي بعدهـا مـا تهنيـت
النـوم جافـي والليـالـي تعيـنـه

بنتٍ لها بين الحنايـا (ميـة بيـت)
يعني لها في جوف صدري ( مدينه)

سكانها من يوم راحت.. (عفاريـت)
صارت خراب ومن بَعَدهـا حزينـه

في كل بيت بجوف صدري لها صيت
( الحاكمه../ وام البلد../ والسجينـه )

احيا واموت الفين مـرّه ليـا جيـت
حبلٍ معه وادعـت (متـن السفينـه)

ياما كتمـت اشـواق قلبـي وهلّيـت
دمعٍ تَـرَك (صكّـات بقعـا) لعينـه

ياما بكيـت مـن القهـر ماتباكيـت
( ودمع العزيز بعين ربعـه غبينـه )

الضيم مجرم والمشاعـر طواغيـت
والدمـع والـي والسعـاده رهينـه

من يوم راحـت بالهـوى ماتمنيـت
الا الحيـاة بـدون بنـت وخديـنـه

مليـت عمـري والدفاتـر ومليـت
ضحكٍ يجي من دون صدقٍ وزينـه

كن البشـر قـدام عينـي (توابيـت)
سـودٍ تنـادي للنَفَـسْ قبـل حينـه

اوحيت لكن من همومي فلا اوحيـت
عندي تسـاوى كـل زينـه وشينـه

ان غنّت الورقى على الغصن غنيـت
صـوتٍ يغشّـي بالشقـى سامعينـه

الليـل (ياليلـي) تعاسـه وتشتيـت
والصبح ينهـش بالخفـوق ويهينـه

(ياساعتي) لو مات نبض المواقيـت
فرحـي فديتـك للحشـا تتركيـنـه

من يوم راحـت غايتـي ماتهنيـت
القلـب تايـه.. والدقايـق حزيـنـه

احيا واموت الفين مـره ليـا جيـت
حبل ٍ معه وادعـت (متـن السفينـه)

================================================== ===============
مَـعْـشـوقــَة الـوَردْ




معشوقة الورد عذر الورد ماخانـك
ويديك لفحة شتاه.. ومبسمك صيفـه

الورد لو عاش طول العمر بأحضانك
ماجفّ غصنه ولا ذبلـت مراهيفـه

وشلون يذبل وهو ياخذ من الوانـك
وشلون بيموت وأنفاسـك سواليفـه

مابين خصلة شعرك وعطر رمانـك
سوالف الـورد.. ومنـادم مواليفـه

ومابين زمّة نحرك.. ولِين ريانـك
بداية الحسـن.. وانهايـة تواصيفـه

ان جيت ابكتب لقيت الشعر ديوانـك
حلاه وصفك.. وبحروفك محاريفـه

ياربة الحسن.. عمر الورد مازانـك
أنتي جماله.. ورقّة غصنه.. وريفـه

وانا كما الورد.. من قربك وتحنانك..
يصفالي الوقت.. لو كثرت صواديفه

زرعت قلبي وسط روضك وبستانك
وأسقيت قاعِه غـرامٍ مابـدا زيفـه

لين أزهرت كل ريضاني وريضانك
بالورد.. وانتي ندى الورد وسواليفه




الــــــــــــــورد ..
وعــقـــود الـــغـــلا ..
والعـطـر لاغـنـى هـــلا ..
مـن وجنتـك وبــل المـطـر ..
وبخصلـتـك نـبـع الـحــلا ..
لـلـورد بأنفـاسـك شـــذى ..
لا عـتّـم الـلـيـل وهـــذى ..
وبلمـسـة يـديـك إغـتــذى ..
وبقـربـك تـكـون الــورود ..
بـحـدود؟ لا مـامـن حــدود ..
كلـك عـلـى بعـضـك كــذا ..
ورد ونــــــــــــدى ..
منـك الغـلا وفـيـك ابـتـدى ..
ماضـاع بـك عمـره ســدى ..
يـاعـطــره الــزاهـــي ..
.
.
.






أميرة الورد؟ أو للورد هـي ملفـى
في كل حالات وصف الزين مرجانه

بيدينها الورد لايسهـد ولا يغفـى ..
وبقربها الورد جوريـه وريحانـه ..

وبشعرها الليـل والتعليـل والمنفـى
وبحسنها الشِعر توصيفـه وقيفانـه

(( اللهم إنا نسألك حبك ،

وحب من يحبك،وحب كل عمل يقربنا إلى حبك ،

اللهم اجعل حبك أحب إلينا من أنفسنا، وأهلينا ،وأولادنا ،ومن الماء البارد على الظمأ )) آمييييين